तोमनाथ उप्रेती
१
खरानीमाथि
नयाँ सपना उम्रियो
उज्यालो भयो।
२
जलिसकेका ती
सपनालाई फूलझैँ
फेरि फुलाऔँ।
३
सहिदको सपना
हाम्रो आँखामा बाँचोस्
देश अघि बढोस्।
४
युवा आगो होइन
अन्धकार हटाउने
दीप बनेर।
५
युवा उठेपछि
देशको भाग्य फेरिन्छ
नयाँ प्रभात।
६
प्रश्न गर्ने मन
उत्तर खोज्ने हातले
भोलि बनाउँछ।
७
टुटेका संरचना
हामी मिलेर जोडौँ
विश्वास फर्काऔँ।
८
आक्रोशलाई अब
विवेकको बाटो दिऔँ
देश बचाऔँ।
९
ढाल्ने हातहरू
अब निर्माणमा जुटून्
सुन्दर नेपाल।
१०
सत्ताभन्दा माथि
जनताको जीवन हो
सेवा नै धर्म।
११
नाताका ती जाल
योग्यताले चुँडियोस्
न्यायले जितोस्।
१२
भ्रष्ट कालो बादल
सत्यको घाम लागे
देश मुस्काओस्।
१३
मेहनती हातमा
अवसरको फूल फुलोस्
देशमै भविष्य।
१४
गाउँका ती बाटा
सहरसँग जोडिऊन्
मन पनि जोडून्।
१५
आमाको आँखामा
अब आँसु होइन हाँसो
नेपाल हाँसोस्।
१६
बाको पसिनाले
देशमै मूल्य पाओस्
घरमै उज्यालो।
१७
हिमाल पहाड
तराई एउटै मुटु
नेपाल हाम्रो।
१८
भाषा फरक हो
मनमा एउटै प्रेम
देश एउटै हो।
१९
माटोको प्रत्येक
कणभित्र देश बोल्छ
मनले सुनौँ।
२०
सीमाका जवान
राष्ट्रको गौरव हुन्
नमन गरौँ।
२१
नारा मात्रै होइन
कर्मले देश बोलोस्
साँचो देशप्रेम।
२२
अधिकारसँगै
कर्तव्यको दीप बालौँ
लोकतन्त्र जोगाऊँ।
२३
प्रतिशोध होइन
न्यायको बाटो रोजौँ
मेलमिलाप होस्।
२४
पुरानो अनुभव
नयाँ पुस्ताको जोस
देश बलियो होस्।
२५
खरानीपछि फेरि
उज्यालो नेपाल बनोस्
साझा हाम्रो देश।