थाहा छ ? हेलिकप्टर चढ्न नि पाइन्छ नि कोशी हरैचा एक्सपोमा

यहि फागुन २१ देखि २९ गतेसम्म कोसीहरैचा उद्योग बाणिज्य संघको आयोजनामा मोरङ बिराटचोकमा हुने कोशी हरैचा एक्सपोमा हेलिकप्टर सफारी लगायत केहि बिशेष आकर्षणहरु रहने भएका छन् ।
एक्सपोमा घोडा सफारी (घोडचढी), बाल उद्यान सहितको खेलकुद स्पोर्ट्स, चौरी गाइको प्रदर्सनी, लोपोन्मुख राउटे जातिको सहभागीता, भेज र नन भेजका छुट्टाछुट्टै मौलिक खानाका परिकार र नेवारी खानाका परिकार रहने आयोजकले जनाएका छन् ।
कोसीहरैचा उद्योग बाणिज्य संघका महासचिव तथा एक्सपो आयोजक मुल समितिका सचिव सन्तोस वान्तवाले दिनुभएको जानकारी अनुसार हेलिकप्टर सफारी (टुरिङ) एक्सपो अबधिभर रहनेछ । हेलिकप्टर सफारी एक्सपो स्थलबाट इटहरी, धरान, भेडेटार र धनकुटाको राजारानी हुँदै महोत्सवस्थलसम्म हुनेछ ।

एक पटकमा ५ जनाले यात्रा गर्न सक्ने सो हेलि सफारी १५ मिनेटको हुनेछ । त्यसको लागि सिम्रीक एयरसंग सम्झौता भैसकेको वान्तवाले जानकारी दिए । हेलि सफारीको लागि ७ हजार ५ सय रुपैयाँ तिर्नुपर्नेछ । हेलिकप्टर चार्टर्ड गर्दा लाखौं रुपैयाँ लाग्ने भएपनि ७ हजार ५ सय तिरेर यात्रा गर्दा यात्रुलाई सहुलियत हुने आयोजकले दाबी गरेको छ । – अम्बिका भण्डारी