ठाउँको ठाउँमै साहित्य रच्ने अभ्यासका लागि बेतनाबाट थालियो ‘साहित्य परिक्रमा’ अभियान

कोही सुकेका रुखको ठुटामा गोत्लिएका त कोही निलो पानीको माछातिर हेरेझैं गरी एकोहोरिएका छन् । वरिपरि हेर्यो भने महिला र पुरुष गरी दर्जनभन्दा बढी भद्रभलाद्मी छन् ,तर सबै आ – आफ्नै सुरमा छन् । न कोही एक अर्कासंग बोल्दै छन् , न त एकले अर्काको वास्ता नै गरेका छन् ।

त्यहाँ  आइपुगेका युवायुवती छक्क पर्दै सोध्छन् -’ यहाँ के भइरहेको छ ? ‘ त्यहीँ छेउमा बसेका कसैले नजिकैको एउटा फ्लास बोर्डतिर इसारा गर्दै कार्यक्रमबारे बताइदिन्छन् । त्यहाँ लेखिएको छ ‘ साहित्य परिक्रमा’ ।

२०७५ भाद्र मसान्तको दिन शनिबार अपरान्ह ३ बजेतिर मोरङ्को बेतना सिमसारमा पुग्दा त्यस्तै दृश्य देखिन्थ्यो । ‘साहित्यकारहरुलाइ लेखन सृजनामा अभ्यास गराउने उद्देश्यले सर्जकका लागि सिर्जना गर्ने विशेष ठाउँ , बिशेष समय र विशेष बिषयबस्तु हुँदैन’ भन्ने नारासहित  बेलबारी साहित्य बिकास समितिले पहिलोपटक आयोजना गरेको ‘साहित्य परिक्रमा’ अभियानको उद्घाटनका दिन सिमसारमा झण्डै दुई दर्जन श्रष्टाहरु त्यसरी भेला भएका थिए । र सबै साहित्यकारहरु घोत्लिनुको कारण थियो – ‘अन द स्पोट लिट्रेचर’ अर्थात ठाउँको ठाउँ रचना र प्रस्तुति ।

हो, त्यसरी एकाएक कुनै पनि बिषय र शिर्षकमा कविता र गजल रचना गरेर शनिबार बेतनामा करिब दुई दर्जन श्रष्टाहरुले साहित्यको नयाँ प्रयोग गरे ।

 साहित्य परिक्रमा कार्यक्रममा साहित्यकारहरु रेखा सुवेदी, कबिन्द्र धिमाल, भक्तशेर लिम्बु , यज्ञराज सुवेदी, तिला लेकाली, शिव छाङ्छा, सोनाली गुरुङ, बादलदेवी चाम्लिङ, गणेश बिक, उमा मानन्धर, राजेन्द्र कार्की, भिमकुमार राई, हिरा खड्का, मिलन राई, सन्देश तामाङ , टेकराज मगर लगायत थुप्रै साहित्यकार हरुले  तत्कालै रचना गरेका कविता र गजल सुनाएका थिए ।

उपस्थित श्रष्टा सोनाली गुरुङले घरमा बसेका बेला फुर्सदमा लेखेर राखिएका रचना ल्याएर बाचन गर्दा भन्दा कार्यक्रम स्थलमै आएर स्वतस्फूर्त रचना गरी त्यहीँ प्रस्तुति गर्दा निकै रमाइलो भएको बताइन् ।

लेखनको खडेरी बढ्दै गएको र बारम्बार पुराना रचना बाचन गर्ने क्रम बढेकाले स्रष्टाहरूलाई तत्काल सृजना गर्न र नयाँ नयाँ रचना बाचन गर्ने बानीको बिकास गराउने उद्देश्यले साहित्य परिक्रमा कार्यक्रम शुरु गरिएको बेलबारी साहित्य बिकास समिति अध्यक्ष रेखा सुवेदीले बताइन् । उनका अनुसार अबदेखि  हरेक १५ दिनमा एकपटक बेलबारी लगायत विभिन्न ठाउँका पर्यटकीय स्थल वा धार्मिक र एेतिहासिक महत्त्व बोकेका ठाउँमा साहित्यकारहरुको जमघट गराइ रचना बाचन गराइनेछ । प्रतियोगिताका रूपमा नभई अभ्यास र जमघटका रूपमा गराइने साहित्य परिक्रमा सम्भब भएसम्म निरन्तर आयोजना गरिने साहित्य बिकास समितिले जनाएको छ ।