उज्यालोमय बन्दै भोक्राहा नरसिंह

दिपेन्द्र यादव, सुनसरी  । लामो समयदेखि अन्धकारमय जीवन बिताउदै आएका भोक्राहा नरसिंह वार्ड ८ का बासिन्दाहरु सोमबारबाट उज्यालोमय  जीवन बिताउन थालेका छन ।

भोक्राहा नरसिंह गाउँपालिका वार्ड ८ का स्थानियबासीहरु विगत दुई दशकदेखि  अन्धकारमय जीवन बिताईरहेपनि अहिले भोक्राहा नरसिंह ८ का वडाध्यक्ष हात्तिम अंसारीको पहलमा घर घरमा विजुली बत्तीको लाइन पुगेको छ ।

विजुली बत्तीको पोल सहित घर घरमा लाइन पुगेपछि भोक्राहा नरसिंह वार्ड नं. ८ का ७ सय घर परिवार खुसी भएका छन ।

सोमबार ८ नं. वडा कार्यालयले एक दिने कार्यक्रमको आयोजना गरी भोक्राहा नरसिंह गाउँपालिकाका अध्यक्ष महेन्द्र प्रसाद यादवले ट्रान्सफर्मरमा लाईन दिई उद्घाटन गरेका छन ।

गाउँपालिका अध्यक्ष यादवले ट्रान्सफर्मरमा लाइन दिए लगतै अहिले भोक्राहा नरसिंह वार्ड नं. ८ का ७ सय घरमा उज्यालो भएको छ ।

सो वडामा १ हजारको संख्यामा घरधुरी रहेपनि हालसम्म ७० जनाको घरमा मात्र मिटर जडान गरिएको छ । पहिला स्थानियहरुले मिटर जडान गरिएपनि भोल्टेज कम भएका कारणले मोवाइल, टर्च लाईट बाल्न मात्र पुग्ने गरेको स्थानिय लुकमान अंसारीले बताए ।

यता स्थानिय अंसारीका अनुसार विगत तिन वर्ष अगाडी ४० जना र गत वर्ष मात्रै ७० जनाले आफ्नो घरमा मिटर जडान गर्नका लागि विद्युत प्राधिकरण इनरुवामा निवेदन सहित सेवा शुल्क वापत १२ सय ९० रुपैँया र १४ सय रुपैँया बुझाएपनि अहिले उनीहरुको घरमा मिटर जडान भएको छैन ।

मिटर जडान गर्न तथा अहिले डिजिटल मिटरका लागि लागु भएको शुल्क २४ सय ४३ रुपैँया तिर्नुपर्ने विद्युत प्राधिकरण इनरुवा शाखाका प्रमुख संजिव शाहले बताए । त्यसैगरी यता भोक्राहा नरसिंह गाउँपालिका वार्ड नंं. ८ का वडाध्यक्ष अंसारीले विद्युत प्राधिकरण इनरुवा शाखाको सहकार्यमा शनिबार, आईतबार र सोमबार गरी तिन दिने मिटर जडान शिविर संचालन गर्ने भएको छ ।

सो शिविरमा आएका सबै सेवाग्राहीहरुको काम एकै दिनमा गर्ने वडाध्यक्ष अंसारीले बताए । मिटर जडानका लागि वडाको सिफरिस, मिटर जडानको लागि शुल्क तिरेको रसिद वडामा नै काट्ने बतावरण मिलाई वडामा शिविरको आयोजना पहिलो पल्ट गर्न लागेको बताए । अहिले वार्ड नं. ८ मा १०० के बी क्षमताको ट्रान्सर्फमर २ वटा र ३० वटा नयाँ विद्युत पोल र अरु थप पुरानो पोलमा नै विद्युत लाइन प्रसारण गर्न अल्मुनियम तार जोडी विद्युत लाइन प्रवाह गरेको अध्यक्ष अंसारीले बताए ।