प्राविधिक शिक्षा तथा व्यावसायिक तालिम परिषद् (सिटिइभिटी) बाट यो पहिलो बर्ष सिभिल ओभरसियर र होटल म्यानेजमेन्ट पढाउनका लागि स्वीकृती पाइसकेको दमक नगरपालिका उपप्रमुख तथा नगर शिक्षा समिति संयोजक गीता अधिकारीले जानकारी दिइन् । यसका लागि आवश्यक नीति नियम र कार्यविधि बनाइ सकिएको भएपनि पुर्वाधार बनाउन केहि समय लाग्ने भएकाले तत्काल घर वा जग्गा भाडामा लिएर प्राबिधिक शिक्षालय सञ्चालन शुरु गर्न लागिएको उनले बताइन् ।
दमकमा बुहप्राविधिक शिक्षालय सञ्चालन गर्नुपुर्व सम्भाब्यता अध्ययन सहित आवश्यक रणनीति बनाउनका लागि नगरपालिकाले हेमनाथ अधिकारीको संयोजकत्वमा कार्यदल बनाएको थियो । कार्यदलले यसको आवश्यकता र औचित्यताबारे दिएको प्रतिवेदनका आधारमा शिक्षालय सञ्चालन गर्ने निर्णय भएको नगरपालिका प्रमुख रोमनाथ ओलीले जानकारी दिए ।
नगरपालिका क्षेत्रभर आवश्यक पर्ने प्राविधिक जनशक्ति स्थानीय सरकारले नै उत्पादन गर्ने लक्ष्य लिएर यसलाइ अघि बढाईएको मेयर ओलीले बताए । सबै प्रकारका प्राविधिक जनशक्ति आफ्नै शिक्षालयबाट उत्पादन गर्ने लक्ष्यका साथ अघि बढेको र अति बिपन्न र कम आयश्रोत भएकाहरुले समेत यहाँबाट प्राविधिक शिक्षा पाउने ओलीले बताए ।
संयुक्त राष्ट्र शरणार्थी उच्चायुक्त कार्यालय (यूएनएचसीआर)ले दमकस्थित हम्सेदुम्से सामुदायिक बनको कार्यालय छेउमा बनाएको तालिम केन्द्रलाइ नै शिक्षालयको रुपमा प्रयोग गर्न लागिएको नगरपालिकाले जनाएको छ ।
आफुहरुले देशभर रहेका बिभिन्न शिक्षालयहरु अध्ययन गरेको र त्यस अनुसार सञ्चालन विधि र प्रक्रिया समेत उल्लेख गरी प्रतिवेदन दिएको कार्यदलका एक सदस्यले बताए । स्थानीय सरकारद्वारा संचालित संभवत नेपालकै र १ नम्बर प्रदेेशको पहिलो यो शिक्षालय भएको नगरपालिकाले दाबी गरेको छ । – विष्णुप्रसाद पोखरेल
