सीसी क्यामेरामय बन्दै राजमार्ग, मोरङमा अढाई सय क्यामेराबाट जिल्लाको निगरानी गर्दै प्रहरी

प्रदेश १ सरकारको सहयोगमा  मोरङका राजमार्गमा ५८ वटा सीसी क्यामेरा जडान गरिएको छ ।

प्रदेश १ सरकारको १ करोड १४ लाख रुपैयाँ बजेटमा ५८ वटा क्यामेरा जडान गरिएको हो ।  सिसी  क्यामेराका लागि मोरङमा ६० किलोमिटर फाइबर बिछ्याइएको छ ।  विराटनगर महानगरपालिको सिमावर्ती क्षेत्र रानीदेखि–ढाटसम्म ३२ वटा, पूर्व पश्चिम राजमार्गको इटहरी पूर्व बुढीखोला चोकदेखि भाउन्ने चोकसम्म १३ वटा र पथरी बजारदेखि उर्लाबारी बजारसम्म १३ वटा सीसी क्यामेरा जडान गरिएको मोरङ प्रहरीले जनाएको छ ।

प्रहरीले प्रयोग गरेका क्यामेराको स्टोरेज जिल्ला प्रहरी कार्यालय मोरङ, इलाका प्रहरी कार्यालय बेलबारी र इलाका प्रहरी कार्यालय पथरीमा राखिएको छ ।६० किलोमिटर क्षेत्रमा बिछ्याइएको ६ ‘कोर’ तार मध्ये सीसी क्यामेराका लागि २ कोर प्रयोग भएको छ । बाँकी चार कोरमा फेस डिटेक्सन क्यामेरा, राडर गन र ट्राफिक लाइट जडान गर्न सकिने छ ।

प्रदेश सरकारको सहयोगमा मोरङमा जडान गरिएको सीसी क्यामेरा सोमबार प्रहरीलाई हस्तान्तरण गरिएको छ । मोरङमाप विराटनगरभित्र र अन्य क्षेत्रमा गरी प्रहरीले १ सय ५४ सीसी क्यामेराबाट निगरानी गरिरहेको छ ।