सुन्दरहरैंचामा जताततै भत्कियो पुर्व पश्चिम राजमार्ग, आन्दोलनमै उत्रिए बाँसबारीका जनता

पुर्व पश्चिम राजमार्ग मर्मत नभएको भन्दै सुन्दरहरैचा वडा नम्वर ४ र ५ का स्थानीय बासिन्दा आन्दोलित भएका छन् ।

भत्किएको लामो समयसम्म पनि सडक मर्मत नगरेको भन्दै स्थानीयबासीले शनिबारदेखि सांकेतिक आन्दोलन शुरु गरेका हुन् । उनीहरू आइतबार १५ मिनेट सडक अवरुद्ध गर्दै प्रदर्शनमा उत्रिएका छन् ।
सुन्दरहरैचाको बाँसबारी चौकमा लामो समयदेखि पुर्व पश्चिम राजमार्ग भत्किएको छ । भत्केको राजमार्गमा सवारी दौडिदा दुर्घटना बढेको  र धुलोको कारण छेउ छाउमा वसी नसक्नु भएको कारण आन्दोलित हुनु परेको स्थानीय गोपाल बरालले बताए ।
स्थानीयले पटक पटक सडक डिभिजन कार्यालय बिराटनगरको ध्यानाकर्षण गराएको भए पनि कुनै सुनुवाइ नभएको कारण आन्दोलित हुनु परेको उनको दाबी छ ।

हुन पनि दुई बर्ष अघि आएको बाढीले बगाएको सडक आजसम्म सामान्य मर्मतसम्म भएको छैन । दैनिक हजारौंको संख्यामा सवारी साधन कुद्ने राजमार्गको बाँसबारीमा झण्डै पाँच सय मिटर सडक लथालिङ्ग  छ ।

स्थानीयको दवावपछि केहि महिना सडक डिभिजन कार्यालय बिराटनगरले पानी छयाप्ने गरेको थियो तर हाल त्यो पनि बन्द गरिएको छ । दैनिक रुपमा १५ मिनेट बाट बढाउदै गाडी बन्द गरी आन्दोलन गर्ने जानकारी गराएका छन् । यता सडक डिभिजन कार्यालयले भने यसमा कुनै प्रतिक्रिया दिएको छैन ।

त्यसो त सुन्दरहरैचाको खोर्साने, हरैँचामोड, बिराटचोक, गछिया लगायत अन्य ठाउँमा पनि राजमार्ग भत्किएर लथालिङ्ग भएको छ । केहि महिनाअघि मात्र मर्मतको महिना दिन पनि नभई राजमार्ग भत्किएको भन्दै सर्वत्र आलोचना र बिरोध भएको थियो । चर्को बिरोधपछि ठेकेदारले पुन: मर्मत गरेपनि फेरि पनि ठाउँ ठाउँमा राजमार्ग भत्किएको छ ।