चार महिनामा पुर्वका ११ सयभन्दा बढीलाइ लाग्यो कोरोना, मोरङमा एकै परिवारका १४ जना संक्रमित

दुई तीन दिनयता प्रदेश नं १ मा ९ सय ५१ जनामा गरिएको पीसीआर परीक्षणमा १८ महिलासहित ५७ जनामा कोरोना देखिएको छ ।

सङ्क्रमण देखिएकामध्ये मोरङमा ४६, झापामा छ र सुनसरीमा पाँच जना रहेको प्रदेश १ को सामाजिक विकास मन्त्रालयका प्रवक्ता डा. सुरेश मेहताले बताए । मोरङमा बिराटनगरका ६ महिलासहित २२, रङ्गेलीका ९ महिलासहित २२ र कटहरीका दुई महिलामा कोरोना देखिएको छ ।

पछिल्लो २४ घण्टामा मोरङमा थप २२ जनामा कोरोना भाइरसको संक्रमण  देखिएको हो ।
कोसी अस्पतालको प्रयोगशालामा परीक्षण गर्दा २२ जनामा कोरोना पोजिटिभ देखिएको हो । संक्रमित सबै रंगेली नगरपालिकाका हुन् । २२ मध्ये १४ जना एकै परिवारका रहेको नगरपालिकाका प्रशासकीय अधिकृत टोमप्रसाद सुवेदीले बताए  ।
एकै पटक २२ जनामा संक्रमण पुष्टि भएपछि नगरपालिकाले रंगेली बजार क्षेत्र अनिश्चितकालका लागि सिल गरेको छ ।

यसैबीच कोशी अञ्चल अस्पतालमा उपचाररत बिराटनगरमा ७७ बर्षका एक वृद्धको कोरोना संक्रमणका कारण मृत्यु भएको छ । ती वृद्धको परिचय खुलाइएको छैन ।

त्यसैगरी झापाको अर्जुनधाराका पाँच र  विर्तामोडकी एक महिलामा पनि कोरोना पुष्टि भएको छ ।  सुनसरीको इटहरीका तीन, धरान र इनरुवामा एक/एक जनाको रिपोर्ट पोजिटिभ आएको प्रवक्ता डा.मेहताले जानकारी दिए  ।

हालसम्म प्रदेश १ मा सङ्क्रमितको सङ्ख्या एक हजार एक सय २८ पुगेको छ । जसमध्ये निको हुने सङ्क्रमितको सङ्ख्या ८ सय २९ पुगेको छ । प्रदेशमा हालसम्म ४५ हजार ७ सय ७१ जनाको पीसीआर परीक्षण भइसकेको छ ।