केराबारीमा कुकुर आतंक, कुकुरले जंगल गएका बाख्रा मार्न थालेपछि थपियो पिरलो (भिडियो सहित)

मोरङको केराबारी गाउँपालिका क्षेत्रमा कुकुर ले बाख्रा मारेर खान थालेपछि किसानहरु हैरान भएका छन् ।

चार पाँचबटा कुकुरको एक बथानले जंगल चर्न गएका बाख्रा टोक्दै मारेर खान थालेपछि केराबारीका स्थानीय बासिन्दालाई पिरलो थपिएको हो ।

बाख्रालाई घाँटीनेर टोकेर घाइते बनाएको र त्यसपछि मासु लुछ्दै खाएर बाख्रालाइ मराणासन्न बनाएको अबस्थामा एक स्थानीयबासीले देखेका थिए । एक्लै खेद्दा कुकुर केहीबेर भागेपनि पुन: आएर टोक्ने गरेपछि ती ब्यक्तिले गाउँ निस्केर हल्ला गरेका थिए । गाउँलेहरु जंगलमा पुग्दा बाख्रो मरिसकेको थियो । बाख्रो कौशिला श्रेष्ठको भएको कमल बहादुर श्रेष्ठले बताए । बुधबार नै कुकुरले तुलामाया ठकुरीका पनि २ वटा बाख्रा मारेको र ती मध्ये एउटा बाख्रो बिहीबार बिहानसम्म नभेटिएको बुद्धि बहादुर बिश्वकर्मा (घताने माइला) ले बताए । केहि दिनयता दिउँसो नै तर्सेर बाख्रा घरतिर आउने गरेको भएपनि बुधबार एकैदिन कुकुरले तीनवटा बाख्रा मारिदिएको बिश्वकर्माले बताए ।

दुई चार बर्षअघि स्याल, बाघजस्ता जंगली जनावरले बाख्रा मार्ने डर भएपनि केही बर्षयता कुनै जनावरको डर थिएन । त्यसैले पहिले पहिले झैँ जंगलमा बाख्रा रुँघेर चराउन छाडिएको छ । बिहान जंगल पठाइदिने र दिउँसो सामान्य रेखदेख गर्ने बाहेक जंगलमा छाडेर बेलुका बाख्रा फर्कदै गरेका बाख्रा लिन मात्र गए हुने भएपछि किसानहरुलाई दिउँसो अरु काम गर्न फुर्सद हुने गरेको थियो । तर यसैसातादेखि कुकुर आतंक बढेपछि स्थानीय बासिन्दाहरुमा पिरलो बढेको र आजकाल आफुहरु ढुक्कै गोठालो जान थालेको कमलबहादुरले बताए ।

त्यसो त पोहोर परार कहिलेकाहीँ कुकुरले आठ- दशवटा सम्म बाख्रा मार्ने गरेको हचुवाकै युवराज गजमेरले बताए । दुई तीन बर्ष अघि लोहोन्द्रा खोलामा धर्धरे मास्तिर कुकुरले मारेका आठ दशवटा बाख्रा एकैपटक फेला परेका थिए । त्यसबेला केराबारीको डाँगी, खयरघारी लगायतका स्थानका बाख्रा पनि कुकुरको शिकार भएका थिए । केही बर्षयता कुकुरबाट दर्जनौं कुकुर मारिए पनि कुकुरबाट कति बाख्रा मारिए भन्ने तथ्यांक कसैसँग छैन ।

कुकुर आतंक रोक्न गाउँले आफैंले कुकुर मार्ने प्रयास गरिरहेका छन् । त्यसो नभए कुकुर मार्नेबारे सर-सल्लाह भइरहेकोे स्थानीय बासिन्दाले बताएका छन् ।

केराबारी गाउँपालिकाको पशु सेवा शाखा प्रमुख बसीलाल साहसँग यसबारे सोद्दा कुकुरले बाख्रा मारेको बारे कुनै जानकारी नभएको बताए । उनले कुकुर मार्न नपाइने तर गाउँलेले समात्न सहयोग गरे गाउपालिकाले रेविजको सुइ लगाउने बताए ।
त्यसो त कुकुरले बाख्रा मार्ने समस्या केराबारीमा मात्रै होइन, पुर्वी नेपालका केही जिल्लामा ब्याप्त छ । झापाको बुद्धशान्ति नगरपालिकाको नवज्योति सामुदायिक वन, थोप्ले गिरान सामुदायिक वन र नमूना सामुदायिक वन लगायत आसपासका क्षेत्रमा पनि दुई तीन बर्षयता कुकुरले बाख्रा मार्ने समस्या जटिल बन्ने गरेको स्थानीय मित्रलाल खड्काले बताए । – अम्बिका भण्डारी