बुवाको काजकिरिया गर्न किरियापुत्री बसे दुई छोरीहरु

मोरङमा दुई दिदी बहिनीहरु दिवंगत बुवाको किरियापुत्री बसेका छन् ।
समाजमा छोरा छोरीमाथिको भेदभावविरुद्ध सन्देश दिँदै उनीहरूले बाबुको काजकिरिया गरेका हुन् ।
धनकुटा जिल्लाको सान्ने घर भइ हाल मोरङ बिराटनगर महानगरपालिका वडा नम्बर १४ मा बस्दै आएका ४१ बर्षिय नेत्र बहादुर पान्डेको असामयिक निधनपछि छोरीहरू डेनिसा पाण्डे र चेल्सिया पान्डे किरियामा बसेका छन् । होटल व्यवसायी पाण्डेको मिर्गौलामा समस्याका कारण शनिबार निधन भएको थियो ।
उनीहरूले घाटमै पुगेर बाबुलाइ दागबत्ती दिएका थिए । आमा मैयाँ पान्डेसँगै दुई छोरीले धार्मिक विधिअनुसार किरिया गरिरहेका छन् । रुढीबादी र गलत संस्कार तोड्दै आफूहरूले बाबुको किरिया गरिरहेको डेनिसाले बताइन् । छोरीले बाबुको मलामी जानु हुँदैन र किरिया गर्नु हुँदैन भन्ने गलत मान्यता रहेको बताउँदै उनले भनिन्, ‘बुवाका सन्तान बहिनी र म मात्र हौं, बुवाले हामीप्रति गरेको त्यागको सम्मान गर्दै किरिया बस्ने निर्णय गरेका हौं ।’ सुरुका केही दिन आफन्त र छिमेकीले असहज माने पनि अहिले प्रशंशा गरिरहेका उनले बताइन् ।