चुलाचुली स्पोर्टिङ क्लबले जित्यो तेश्रो कुसुमे उधौली कपको उपाधी

उधौली पर्व चासोक ताङ्नाम, साकेला, चासुवा, फुलस्याँदर को अबसरमा आयोजित तेश्रो कुसुमे उधौली कपको उपाधी झापाको चुलाचुली स्पोर्टिङ क्लबले जितेको छ ।
तेश्रो उधौली कप फुटबल प्रतियोगिताको शनिबार डिफेन्डिङ च्याम्पियन रोयल स्पोर्टिङ क्लब झापालाई २-० गोलले पराजित गर्दै चुलाचुलीले उपाधी जितेको हो ।
चुलाचुलीले फाइनल खेल शुरु भएको पहिलो मिनेटमै पहिलो गोल गरेको थियो । चुलाचुलीका जर्सी नम्बर ११ का बाबुराम थारुले गोल गर्दै खेललाई १-० को अबस्थामा पुर्याएका थिए । ६० मिनेटमा खेलाइएको खेलको पहिलो हापमा दुवैतर्फबाट गोल गर्ने प्रयास गरेपनि थप गोल नहुँदा खेल १-० को अबस्थामा थियो ।
दोस्रो हापको १२ औ मिनेटमा रोयल स्पोर्टिङका गोलकिपर कुमार गुरुङ रातो कार्ड पाएर बाहिरिएपछि रोयल किपर सहित ८ खेलाडीमा सिमित भएको थियो । दोस्रो हापकै १४ औं मिनेटमा गोल किपर अगाडि बढेको अबस्थाको फाइदा उठाउँदै चुलाचुलीका जर्सी नम्बर ११ का खेलाडी मिक्सन दासले थप गोल गरेपछि खेललाई २-० को अवस्थामा पुर्याउँदै जित सुनिस्चित गरेको थियो ।
प्रतियोगितामा उपाधी जितेसँगै चुलाचुलीले ७५ हजार नगदसहित ट्राफी, मेडल र प्रमाणपत्र प्राप्त गरेको छ भने र दोस्रो रोयल स्पोर्टिङ क्लबले ४१ हजार नगदसहित शिल्ड, मेडल र प्रमाणपत्र पाएको छ । फाइनल खेलको म्यान अफ द म्याच चुलाचुलीका गोलकर्ता मिक्सन दास घोषित भए । केराबारी गाउँपालिकाका अध्यक्ष सुमन मिरिङ्चिङ्ले बिजेता र उप-बिजेता एवम् खेलाडीहरुलाइ पुरस्कार प्रदान गरे ।
प्रतियोगिता शुरु हुनुअघि र मध्यान्तरमा राइ, लिम्बू र मगर समुदायको साकेला, पालाम र हुर्रा साँस्कृतिक झाँकीहरु प्रस्तुत गरिएको थियो ।
गत आइतबारदेखि शुरु भएको प्रतियोगितामा एपीएफ पकली , लेटाङ फुटबल क्लव, पटनाली फुटबल क्लव (धरान), चुलाचुली फुटबल क्लव (झापा), गोल्डेन स्टार क्लव (दुहबी), कुसुमे साइनिङ क्लव, रोयल स्पोर्टिङ क्लव, दमक र भाउन्ने युथ क्लव गरी मोरङ, सुनसरी र झापाका ८ टीम सहभागी थिए ।
प्रतियोगिताका लागि केराबारी गाउँपालिका मुख्य सहयोगी, देवीझोडा सामुदायिक वन मुख्य प्रायोजक , सीजी ग्रुप प्रायोजक छन् ।
प्रतियोगिताबाट ४ लाख ५० हजार आम्दानी र ४ लाख रुपैयाँ खर्च हुने अनुमान गरिएको थियो । कुसुमे साइनिङ क्लबले बिगत तीन बर्षदेखि बर्सेनि उधौली पर्वको अबसरमा प्रतियोगिता आयोजना गर्दै आएको छ ।यसअघि दोस्रो उधौली कपको उपाधी रोयल स्पोर्टिङ क्लबले जितेको थियो ।