आफू र आफ्ना लागि होईन, देश र जनताका लागि गरियोस् राजनीति

सरोज बास्तोला

हालै सम्पन्न चुनावले नेपाली जनताको भावना, अपेक्षा र परिवर्तनप्रतिको चाहनालाई स्पष्ट रूपमा देखाएको छ। चुनावका क्रममा कसैले के भने, के गरे, त्यो सबै पूर्ण रूपमा सही नहुन पनि सक्छ, कतिपय कुरा गलत पनि हुन सक्छन्। तर अब चुनाव सकिएको छ। त्यसैले अब आरोप–प्रत्यारोपभन्दा माथि उठेर देश र जनताको हितका लागि एकताबद्ध भएर अघि बढ्ने समय आएको छ।
जनताले रास्पालाई विश्वास गर्दै झन्डै दुई तिहाइ नजिक मत दिएका छन्। यो मत केवल एउटा दलको विजय मात्र होइन, जनताको परिवर्तनप्रतिको आशा र भरोसाको अभिव्यक्ति पनि हो। भोट दिने सबै यही देशका नागरिक हुन्, र जित्नेहरू पनि अब सबै नेपालीका प्रतिनिधि हुन्—कुनै एक पार्टीका मात्र होइनन्।
जनताले दिएको मतलाई देवताको प्रसादजस्तै पवित्र मानेर सम्मान गर्नुपर्छ। जसरी प्रसादलाई श्रद्धापूर्वक निधारमा लगाउँदा गर्व र सम्मानको अनुभूति हुन्छ, त्यसरी नै जनताले दिएको विश्वासलाई पनि इमानदारी र जिम्मेवारीका साथ जोगाउनु आवश्यक हुन्छ। यही विश्वासलाई बलियो बनाउने अपेक्षा रास्पाप्रति जनतामा देखिन्छ।
आउँदा पाँच वर्ष रास्वपाका लागि ठूलो अवसरसँगै गम्भीर चुनौती पनि आएको छ। अब एकढिक्का भएर देशको विकास, सुशासन र जनताको विश्वास जित्ने काममा लाग्नु आजको आवश्यकता हो। मतदाताले वैकल्पिक सोच र नयाँ योजनाप्रति भरोसा देखाएका छन्, त्यसैले विजयी दलले आफ्ना वाचापत्र र प्रतिबद्धताप्रति पूर्ण जिम्मेवारी बहन गर्नुपर्छ भने अन्य दलहरूले पनि सचेत र जिम्मेवार प्रतिपक्षीका रूपमा खडा हुनुपर्छ।
अन्ततः जनताको स्पष्ट सन्देश यही हो -आफू र आफ्नाभन्दा माथि उठेर राष्ट्र र जनतालाई केन्द्रमा राखेर राजनीति गरियोस्। सकारात्मक सोच, सभ्य व्यवहार र सहकार्यबाट मात्र देश अघि बढ्न सक्छ।
(लेखक नेपाल पत्रकार महासंघ, कतार शाखाका पूर्व–सल्लाहकार हुन् )