विनाशकारी बाढीपछि मोरङ लेटाङका चार जना सम्पर्कविहीन

रसुवामा आएको विनाशकारी बाढीपछि मोरङ लेटाङका चार जना सम्पर्कविहीन भएका छन् ।

लेटाङ नगरपालिका-६ लामिटारका मेघा चेम्जोङ, सोना चेम्जोङ, देवीमाया तामाङ र पासाङ तामाङको खोजी तथा उद्धारका लागि आवश्यक समन्वय र पहल गरिदिन लेटाङ नगरपालिकाले जिल्ला प्रशासन कार्यालय मोरङलाई औपचारिक आग्रह गरेको छ ।

नगरपालिकाले २०८३ भदौ १२ गते जिल्ला प्रशासन कार्यालय मोरङलाई पठाएको पत्रमा उनीहरु रसुवा बजार क्षेत्रमा रहेको र बाढीपछि सम्पर्कविहीन भएको उल्लेख गरेको छ । नगरपालिकाका अनुसार उनीहरू एउटै परिवारसँग सम्बन्धित छन् ।

रसुवाको भोटेकोशी क्षेत्रमा आएको बाढीपछि विभिन्न काम तथा व्यवसायका सिलसिलामा रसुवा पुगेका मोरङका नागरिकहरू सम्पर्कविहीन भएको जिल्ला प्रशासन कार्यालय मोरङको विवरणसँग पनि यी चार जनाको नाम मिल्छ ।

उनीहरू हाइड्रोपावर, व्यापार तथा अन्य व्यावसायिक क्षेत्रमा कामका सिलसिलामा रसुवा पुगेको स्थानीय तथा प्रशासनिक विवरणमा उल्लेख छ ।

जिल्ला प्रशासन कार्यालय मोरङले बाढी प्रभावित क्षेत्रमा सम्पर्कविहीन भएका व्यक्तिहरूको खोजी तथा उद्धारका लागि सम्बन्धित निकायसँग समन्वय गरिरहेको जनाएको छ । बाढी प्रभावित क्षेत्रबाट मोरङका केही व्यक्तिको उद्धारसमेत भएको थियो ।

लेटाङ नगरपालिकाका नगर प्रमुख भूपेन्द्रकुमार लावतीले हस्ताक्षर गरेको पत्रमा भने चारै जनाको खोजीका लागि तत्काल आवश्यक समन्वय र पहल गर्न आग्रह गरिएको छ । सम्पर्कविहीन चारै जनाको अवस्था यकिन हुन नसक्दा लेटाङ-६ लामिटारका परिवार तथा स्थानीयवासी उनीहरूको सकुशल उद्धारको प्रतीक्षामा छन् ।