घटनाको ४० वर्षपछि छिन्ताङ हत्याकाण्डका सहिद परिवारले बल्ल पाए राहत 

ईश्वर थापा, धनकुटा । हत्या भएको ४० वर्षपछि धनकुटाको शहीदभूमि गाउँपालिकाका शहीद परिवारलाई आर्थिक सहयोग वितरण गरिएको छ ।

प्रदेश सरकारले धनकुटाको शहीदभूमि गाँउपालिकाको खोकु–छिन्ताङ्ग र आँखिसल्लामा २०३६ सालमा हत्या गरिएका १६ व्यक्तिका परिवारलाई बुधबार एक जना शहीदका परिवारलाई पाँच लाख रुपैयाँका दरले आर्थिक सहयोग वितरण गरेको हो ।
सहिद स्मृति पार्कमा आयोजित कार्यक्रममा प्रदेश १ का मुख्यमन्त्री शेरधन राईल आर्थिक सहयोग वितरण गरेेेका छन् ।

पञ्चायती शासनको विरोध गर्दा तत्कालिन सरकारले खोकु, छिन्ताङ र आँखिसल्लाका १६ जना स्थानीयको हत्या गरेको थियो। हत्या भएको करिब ३८ वर्षपछि सरकारले गत २०७४ पुसमा उनीहरुलाई राष्ट्रिय शहीद घोषणा गरेको थियो । यस्तै गत कात्तिक २२ गते प्रदेश सरकारले राहत दिने निर्णय गरेको थियो ।

कार्यक्रममा बोल्दै मुख्यमन्त्री राईले देशमा आएको संघीयताको कारणले सहिद परिवारमा आर्थिक सहयोग वितरण सम्भव भएको बताए । देशमा संघीयता नआएको भए अझै धेरै वर्ष सहिदले राहत नपाउने भन्दै मुख्यमन्त्री राईले संघीयताको विरोध होइन जोगाउन सबै लाग्नुपर्ने बताए ।