ट्राईबेकरमा च्यासल यूथ क्लबलाई हराउँदै रोलिङ क्लब झापा बेलबारी गोल्डकपको सेमिफाइनलमा

चौथो अन्तर्राष्ट्रिय आमन्त्रण बेलबारी गोल्डकप फुटबल प्रतियोगिताको उद्घाटन खेलमा च्यासल यूथ क्लब काठमाडौँलाई ट्राईबेकरमा ४-३ ले पराजित गर्दै रोलिङ क्लब धुलाबारी झापा विजयी भएको छ ।

खेल सुरु भएको १२ मिनेटमै च्यासलका रुपेस वर्तौलाको पासमा सुसन लामाले गोल गर्दै गोलको खाता खोलेका थिए । पहिलो हापको निर्धारित समयावधि भर दुवै टीमले थप कुनै गोल थप्न सकेनन् । दोस्रो हाफको २२ औँ मिनेटमा झापाबाट खेलेका विदेशी खेलाडी हेन्थी वेलेले वान इन वान गोल गर्दै खेललाई बराबरीमा पुर्‍याए । निकै प्रतिस्पर्धात्मक रहेको खेलको निर्धारित र अतिरिक्त समयमा पनि दुबै टिमले दोस्रो गोल थप्न नसकेपछि खेल १-१ को बराबरीमा सकिएको थियो । खेलको निर्धारित समयमा दुवैतर्फ पटकपटक गोल गर्ने अबसर मिलेपनि थप गोल हुन सकेन ।

पहिलो जितसँगै रोलिङ क्लव धुलाबारी सेमिफाइनल प्रबेस गरेको छ भने च्यासल प्रतियोगिताबाट नै बाहिरिएको छ ।

त्यसपछि भएको ट्राईबेकरमा रोलिङ क्लब धुलाबारीले चार गोल गर्न सफल भएपनि च्यासल यूथ क्लबका खेलाडीले तीन गोल मात्रै गरे । उद्घाटन खेलको म्यान अफ दि म्याच रोलिङ क्लब धुलाबारी झापाका गोल रक्षक मनोज प्रधान घोषित भए ।

दोस्रो खेलमा शुक्रवार सशस्त्र प्रहरी बलको एपीएफ क्लब काठमाडौँ र भारतको रोयल फुटबल क्लब सिलिगुडी बिच प्रतिस्पर्धा हुनेछ ।

बेलबारी ११ स्थित लक्ष्मी खेलमैदानमा जारी प्रतियोगितामा एपिएफ काठमाडौँ, हिमालयन शेर्पा र च्यासल काठमाडौँ , मोरङ, धनकुटा, उदयपुर, झापा र रोयल फुटबल क्लब सिलिगुडी जस्ता ८ वटा ए डिभिजन क्लबहरू सहभागी छन् ।

बेलबारी नगरपालिकाको सहयोग र बुद्ध एयरको मुख्य प्रायोजनमा हुने प्रतियोगितामा विजेता टिमले पाँच लाख र उपविजेता टिमले दुई लाख ५० हजार रूपैयाँ नगद पुरस्कार सहित ट्रफी, मेडल र प्रमाणपत्र पाउने छन् । प्रतियोगिता अन्तरगत प्रत्येक खेलको म्यान अफ द म्याचले पाँच हजार पाँच सय, प्रतियोगिताका सर्वोत्कृष्ट खेलाडीले ३१ हजार, सर्वाधिक गोलकर्ताले २१ हजार तथा उत्कृष्ट गोलरक्षक, डिफेन्स, मिल्डफिल्डर, स्ट्राइकर र उत्कृष्ट प्रशिक्षकले ११-११ हजार रूपैयाँ नगद पुरस्कार पाउने छन् ।
आयोजकका खेलाडीलाई आवतजावतको लागि दुईतर्फी रूपमा रात्रिकालीन यातायात खर्च व्यवस्था गरिने भएको छ । पहिलो खेलमा सहभागी भएर बाहिरिने टिमलाई १५ हजार र त्यसपछि प्रत्येक टिमलाई २० हजार रूपैयाँका दरले सहयोग गरिने र खेलाडीलाई खान, बस्न र दैनिक भत्ताबापत एक हजार तीन सय रूपैयाँ दिइने आयोजक साँगीहाट युथ क्लबका सचिव शम्भु बस्नेतले बताए ।

प्रतियोगितामा ४० लाख रूपैयाँ खर्च र ४५ लाख रूपैयाँ आम्दानी हुने अनुमान गरिएको क्लबले जनाएको छ । प्रतियोगिताबाट नाफा भएको रकम खेलाडी उत्पादन र विभिन्न सामाजिक काममा खर्च गरिने आयोजक डाँगीहाट युथ क्लबका अध्यक्ष बिक्रम राइले जानकारी दिए ।