हिमालयन शेर्पा क्लबले जित्यो चौथो अन्तर्राष्ट्रिय आमन्त्रण बेलबारी गोल्डकपको उपाधि

चौथो अन्तर्राष्ट्रिय आमन्त्रण बेलबारी गोल्डकपको उपाधि हिमालयन शेर्पा क्लबले उचालेको छ ।

बुधबार लक्ष्मी खेल मैदानमा भएको फाइनलमा सशस्त्र प्रहरी बल (एपीएफ) काठमाडौंलाई ३-१ को गोल अन्तरले हिमालयन शेर्पाले उपाधि रक्षा गरेको हो ।

खेल सुरु भएको ५ मिनेटमा हिमालयन शेर्पाका एन्जल गुरुङले गोल गर्दै अग्रता कायम गरे पनि ४३ मिनेटमा एपीएफका रवि थिङ्ले गोल गर्दै टिमलाई बराबरीमा उभ्याएका थिए ।

पहिलो हाफमा रक्षात्मक देखिएको एपीएफ दोस्रो हाफमा भने कमजोर देखियो । खेलको ७१ मिनेटमा हिमालयन शेर्पाका विदेशी खेलाडी मुटुम्बाले र ८९ औ मिनेटमा सुरेश कुमालले १/१ गोल गर्दै टिमलाई जिततिर लम्काएका थिए । फाइनल खेलको म्यान अफ द म्याच हिमालयन शेर्पा क्लबका संजित राई घोषित भए ।

प्रतियोगितामा बेष्ट गोल किपर हिमालयनका  किशोर गिरी, बेष्ट डिफेन्स हिमालयनकै एन्जल गुरूड, बेष्ट मिड फिल्ड सशस्त्रका नबिन लामा,
बोष्ट फरवार्ड हिमालयन क्लबका मुटुम्बा, बेष्ट कोच हिमालयन क्लबकै
युगल किशोर राई र राइजिड्ग प्लेयर्स आयोजक डागिहाट युथ क्लबका रोहन कार्की बने । उनीहरूले जनही ११ हजार पाएका छन् । त्यसैगरी हाइ स्कोरर शशस्त्रका आशिष लामा बने । तीन गोल गरेका उनले २१ हजार पाए ।                                      प्रतियोगितामा सर्बश्रेष्ठ खेलाडी हिमालयन शेर्पा क्लबका बिश्वास श्रेष्ठ घोषित भए । उनले  ३१ हजार नगदसहित शिल्ड पाए । तर पुरस्कार दिने क्रममा खाम साटिएका कारण ११ र २१ हजार पुरस्कार पाउनेमध्ये एकजना कसैले ३१ हजार पचाए । अन्त्ययमा सर्वश्रेष्ठ खेलाडीलाई पैसा थपेर आयोजकले पुरस्कार दिए ।

बेलबारी नगरपालिकाको सहयोग र बुद्ध एयरको मुख्य प्रायोजनमा हुने प्रतियोगितामा विजेता टिमले पाँच लाख र उपविजेता टिमले दुई लाख ५० हजार रूपैयाँ नगद पुरस्कार सहित ट्रफी, मेडल र प्रमाणपत्र पाएका छन् । प्रतियोगिताका सर्वोत्कृष्ट खेलाडीलाई ३१ हजार, सर्वाधिक गोलकर्तालाई २१ हजार तथा उत्कृष्ट गोलरक्षक, डिफेन्स, मिल्डफिल्डर, स्ट्राइकर र उत्कृष्ट प्रशिक्षकला ११-११ हजार रूपैयाँ नगद पुरस्कारको ब्यबस्था गरिएको छ ।

प्रतियोगितामा ४० लाख रूपैयाँ खर्च र ४५ लाख रूपैयाँ आम्दानी हुने अनुमान गरिएको थियो । प्रतियोगिताबाट नाफा भएको रकम खेलाडी उत्पादन र विभिन्न सामाजिक काममा खर्च गरिने आयोजक डाँगीहाट युथ क्लबले जनाएको छ ।

चौथो अन्तर्राष्ट्रिय आमन्त्रण बेलबारी गोल्ड कपमा शशस्त्र प्रहरीको एपीएफ क्लब , हिमालयन शेर्पा क्लब, च्यासल क्लब काठमाडौँ , आयोजक डाँगीहाट युथ क्लब, राजारानी फुटबल क्लब धनकुटा, उदयपुर फुटबल क्लब , रोलिङ क्लब झापा र रोयल फुटबल क्लब सिलिगुडी गरी ८ वटा टीम सहभागी थिए ।