लोहोन्द्रा खोलाको बालुवा निकालेरै गुजारा चलाउंछन् मजदुरहरु

अनिल बराल, बेलबारी मोरङ । दैनिकजसो बिहान उज्यालो भएपछि बेलबारी र सुन्दरहरैचा नगरपालिकाका मजदुरहरु लोहन्द्राको किनारमा पुग्छन् । जाडो गर्मी नभनीकन बिहान ५/६ बजेतिर खोलामा पुगेका हुन्छन् अनि शुरु हुन्छ पानीभित्र रहेको बालुवा निकाल्ने, चाल्ने । 

समथर जमिनमा थुपारेको बालुवा, गिट्टी र ढुंगा ओसार्न ट्र्याक्टर तयारीमा हुन्छन् । धेरै मजदुर बालुवा पानीबाट निकाल्ने, चाल्ने काममा व्यस्त देखिन्छन् ।
सुन्दरहरैचाका लाल बहादुर कड्वालल पनि लोहान्द्रा खोलाबाट बालुवा निकालेर कमाएको रकमले आफ्नो दैनिक जीवन चलाइरहेका छन्  । उनी बिहान ५ बजे खोलामा आइपुगेका हुन्छन । खोलामा बालुवा चाल्दै गरेका सुन्दरहरैचाका कड्वाल पानीभित्रबाट निकालिएको बालुवा बाट ढुङ्गा, गीटी र बालुवा छानेर छुट्टा छुट्टै बेच्ने गरेको बताउछन् । छानेर छुट्याइएको मसिनो बालुवाले वाल प्लस्तर गर्ने, केहि खस्रोले इट्टा जोड्ने तथा खस्रोले पिल्लर बनाउने र त्यहाँबाट निकालिएका ढुङ्गा पनि सोलिङ गर्ने गरी छुट्टाछुट्टै बिक्रि हुने उनले सुनाए ।
खोलामै बालुवा निकाल्ने अम्बर बहादुर बिक बिहान ६ बजे देखि साँझ ६ बजेसम्म खोलामै काम गर्छन । दिनको ८ सय सम्म कमाईहुने उनले बताए । छोरो सहित मन कुमारी बिक पनि खोलामा यहि काम गर्छिन । खोलाबाट भएको आम्दानीले घरखर्च टरेको उनले बताइन् ।
खोलाको किनारमा बालुवा चाल्ने र बालुवा बोक्ने ट्यक्टरको धुइँरोजस्तै हुन्छ । बुढापाका, तन्नेरी, युवा, युवती पनि सो काममा व्यस्त देखिन्छन् । खोलाको दुवै किनारामा सयौ यस्ता मजदुरहरु दैनिक बालुवा निकाल्दै आफ्नो कार्यथलो बनाइरहेका छन्

लोहान्द्रा खोलाले वर्षायाममा बालुवा, गिट्टी र ढुंगा ल्याएर थुपारिदिन्छ । थुपारिएको बालुवा मजदुरहरुले चाल्छन र बिक्री गर्छन् । ढुङ्गा र गिटी खोलाबाटै प्रति ट्याक्टर १ हजारमा बिक्री हुन्छ भने बालुवा ८ सयमा बिक्री हुन्छ । सयौँ मजदुरको जमघट र कार्यथलो त्यही भएकाले चिया खाजाको व्यापार पनि खोलामै हुन्छ ।