बेलबारीको लक्ष्मी मावि मा आयोजित महापुराणमा ५० लाखभन्दा बढी संकलन

विद्यालय बस खरिद र ऐतिहासिक संग्रहालय निर्माणका लागि सहयोग जुटाउने उद्देश्यले मोरङ बेलबारी ११ स्थित लक्ष्मी माध्यमिक बिद्यालयमा आयोजित श्रीमदभागवत समावेशी महापुराणमा जम्मा ५० लाख ६० हजार ९ सय ४० रुपयाँ संकलन भएको छ ।

मंसिर १८ गतेदेखि २५ गतेसम्म भएको महापुराणमा ५० लाखभन्दा बढी आम्दानी भए पनि ८ लाख ८५ हजार ८ सय १९ रुपैयाँ खर्च भएको र खर्च कटाएर ४१ लाख ७५ हजार १ सय २१ रुपैयाँ बचत भएको विद्यालयले जनाएको छ ।

पुराणमा राधिका दासीले मुख्य कथाबाचिकाको रुपमा पुराण बाचन गरेकी थिइन् । पुराणमा दाताहरुले उल्लेख्य सहयोग गरेको र संकलित रकमबाट विद्यालयका लागि स्कुल बस खरिद गरिने र बचेको रकम संग्रहालयका लागि खर्च गरिने बिद्यालयका प्रधानाध्यापक गोबिन्द भण्डारीले बताए ।