सामुदायिक वनको साधारणसभामा कानुनमन्त्रीको आतिथ्यता, नेकपामा आए सातजना कांग्रेस

पथरीशनिश्चरे, मोरङ । कानून, न्याय तथा संसदीय व्यवस्था मन्त्री भानुभक्त ढकालले मोरङ पथरीशनिश्चरेको भुटानी शरणार्थी शिविर छेउमा निर्माण गर्न लागिएको आदिवासी जनजाति संग्रहालय निर्माणको विषयमा अनावश्यक टिका टिप्पणी नगर्न आग्रह गरेका छन्   ।

मोरङ निर्वाचन क्षेत्र नम्वर ३ का संघीय सांसद तथा  मन्त्री ढकालले शनिबार आफ्नो निर्वाचन क्षेत्र अन्तर्गतको पथरीशनिश्चरेमा सम्पन्न एक कार्यक्रममा सो आग्रह गरेका हुन्  । उनले आफुले निर्वाचनमा गरेको प्रतिबद्धता अनुसार आदिवासी जनजाति संग्रहालय निर्माण  हुने बताए  । उनले पाथीभरा, वराहक्षेत्र र हलेसी जस्तै महत्त्वपूर्ण  धाम बनाउने कुराप्रति नतर्सिन अनुरोध समेत गरे  ।

आफ्नो निर्वाचन क्षेत्रको समस्याको रुपमा रहेको वसोवासको समस्यालाई कानून वनाएर समाधान गर्ने समेत दोहोर्याउँदै उनले आफुहरुले वचन दिएका काम गरेरै छोड्ने प्रतिवद्धता व्यक्त  गरे । वैशाखसम्ममा भूमि सम्वन्धि कानून वनाइसक्ने उनको भनाइ थियो । वेथितीको अवस्थाको मुलुक नयाँ हिसावले निर्माण गर्न केही समय लागेको उल्लेख गर्दै उनलेे हालसम्म १ सय ५६ वटा कानून वनाएर थिती वसाल्दै गरेको जनाए  ।

नेकपाको भेटघाट कार्यक्रमका क्रममा मन्त्री ढकालको हातबाट टीका लगाएर नेपाली कांग्रेसका २ नम्वर वडा सदस्यका उम्मेदवार खडानन्द न्यौपाने सहित सोही पार्टीका गंगाप्रसाद घिमिरे, खड्गप्रसाद भारती, लालबहादुर सोडारी, सुरेन मैनाली सहित ७ जना नेकपामा प्रवेश गरेका छन्  ।

भेटघाट कार्यक्रमपछि शनिबार नै डाँसमोरङ्गी सामुदायिक वन समूहले आफ्नो १७ औं साधारणसभाका अवसरमा मन्त्री ढकाललाई सम्मानपत्रले सम्मानित गरेको थियो  ।