राष्ट्रिय लोक तथा दोहोरी गीत प्रतिष्ठान नेपालको आयोजनामा हुने प्रतियोगितामा विभिन्न १८ वटा दोहोरी टिमले प्रतिस्पर्धा गर्दैछन् । प्रतिष्ठानले बिहिबार टोखाको धापासी स्थित केन्द्रीय कार्यलयमा पत्रकार सम्मेलना गर्दै प्रतियोगिताबारे जानकारी दिएको छ ।
तीन दिन चल्ने प्रतियोगिताको सम्पूर्ण तयारी पूरा भएको राष्ट्रिय लोक तथा दोहोरी गति प्रतिष्ठानकी अध्यक्ष रीता थापा मगरले जानकारी दिइन् ।
विदुर नगरपालिकास्थित ईलम प्रशिक्षण केन्द्रमा आयोजना हुने यो प्रतियोगिताले नेपाली लोक संस्कृतिको संरक्षण, स्रष्टाको सम्मान र नव प्रतिभाको प्रोत्साहन गर्ने मूल उद्देश्य राखेको छ ।
प्रतियोगितालाई समावेशी र प्रतिस्पर्धी बनाउन सातै प्रदेशबाट सिफारिस बएका दुई -दुइ समूह, उपत्यका समन्वय समितिका दुइ समूह र विदेश शाखाका दुइ समूह गरी कुल १८ वटा टीमले रनिङ शिल्डका लागि प्रतिस्पर्धा गर्नेछन् ।
प्रतियोगितामा प्रथम हुने टोलीले शिल्डसहित नगद तीन लाख रुपैयाँ , द्वितीय हुनेले २ लाख, तृतीले १ लाख र सान्त्वना ५० हजार रुपैयाँ पाउनेछन् ।
विधागततर्फ उत्कृष्ट गायक, उत्कृष्ट गायिका, उत्कृष्ट नवगायक, उत्कृष्ट नवगायिका, अनुशासित गायक/गायिका, र उत्कृष्ट भेषभूषामा प्रस्तुत हुने गायक–गायिकाका लागि समेत आकर्षक पुरस्कारको व्यवस्था रहेको प्रतिष्ठानले जबाएको छ ।
प्रतियोगिताको उद्घाटन समारोहमा बागमती प्रदेशका पूर्व मुख्यमन्त्री माननीय बहादुर सिंह लामा प्रमुख अतिथिका रूपमा सहभागी हुनेछन् । दोस्रो दिन बागमती प्रदेशका संस्कृति तथा पर्यटन मन्त्री माननीय सुरेश श्रेष्ठ र समापन समारोह (अन्तिम दिन) मा विदुर नगरपालिकाका प्रमुख राजनलाल श्रेष्ठ प्रमुख अतिथिका रूपमा रहनेछन् ।
मूल समारोहको संयोजक प्रतिष्ठानकी केन्द्रीय अध्यक्ष रीता थापा मगर आफैँ रहेकी छिन् भने सह–संयोजकमा प्रशासनिक उपाध्यक्ष दीपक खड्का र उप–संयोजकमा केन्द्रीय सदस्य उषा सुवेदी रहेका छन् ।
सांस्कृतिक कार्यक्रम व्यवस्थापनको जिम्मेवारी वरिष्ठ उपाध्यक्ष पशुपति शर्माले सम्हालेका छन् भने कार्यक्रम निर्देशकका रूपमा उज्वल जंग ठकुरी रहेका छन् । मञ्च व्यवस्थापनमा रामजी खाँण र अतिथि सत्कारमा राधिका हमाललगायतका कलाकारहरू विभिन्न उपसमितिमा सक्रिय छन् ।
कार्यक्रमको कुल अनुमानित बजेट ६८ लाख ४० हजार रुपैयाँ रहेको छ । कार्यक्रमको मुख्य संरक्षक बागमती प्रदेश संस्कृति तथा पर्यटन मन्त्रालय रहेको छ भने संरक्षकका रूपमा विदुर नगरपालिका र टोखा नगरपालिका रहेका छन् । नुवाकोट उद्योग वाणिज्य संघ यसको प्रवद्र्धक रहेको छ भने मुख्य सहयोगी संस्थाको रूपमा नुवाकोट निर्माण व्यवसायी संघ रहेको छ ।
प्रतियोगितालाई नुवाकोटमै पुगेर प्रत्यक्ष रूपमा करिब २० हजार दर्शकले अवलोकन गर्ने तथा विभिन्न सञ्चारमाध्यम र सामाजिक सञ्जालमार्फत देश तथा विदेशमा रहेका करिब ५० लाख नेपाली तथा नेपालीभाषी दर्शकले हेर्ने अपेक्षा प्रतिष्ठानको छ । प्रतिष्ठानले प्रवेश निशुल्क रहेको कार्यक्रममा सहभागी हुन सम्पूर्ण लोक सङ्गीतप्रेमी, सञ्चारकर्मी र आम नागरिकलाई अपिल गरेको छ ।
